گرگ

گَرَگ : (گَ رَ گْ) مَچّ ءِ گَرَگ بزاں هما جاگہ کہ نوکیں لُٹّ در کاینت - راج ءِ گَرَگ بزاں جْوان تریں مردم - گَرَگ جنگ : دْرچک ءُ بوٹگانی .

گِرَگ : (گِ رَ گْ) زورگ - بها زورگ - یکّے ءَ پہ دْرک رسینگ - کسے گرَگ ءُ آرَگ - دست جنَگ - سیر کَنَگ - آپ ءِ گِرَگ : چہ کَور چہ هَور + پہ جنگ ءَ - امبازاں گرگ : گْولائیش کنگ - باد ءِ گرگ : باد ءِ نادراهی ءِ گرگ - بْرانز گرگ : گرم گِرَگ ، سکّ زهر گرگ - بُن گِرَگ : آس گِرگ ، روک بیگ - بند گرگ : ڈیکّ ورگ ، مل ورگ -بیر گرگ : چہ دژمن ءَ - پاداں گرگ : پاداں سُست دارگ - پچ گرگ : زیرگ پہ مهر یا پہ زور - پَد گِرگ : پادانی نشان ءَ چارگ - پر گرگ : گُد ءِ - پونز گرگ : زهر بیگ - پونز ءِ گرگ : پہ چیزے ءِ میار کنگ ءَ بزاں پونز ءِ باهوٹ کنگ - تاب گرگ : تاب وَرَگ ، ساد ءِ ، بندیک ءِ ، مود ءِ - تْراس گرگ : هزَگ ، هز ورگ ، سِٹ کنگ - تْرند گرگ : تپ ءِ گرگ - داد گرَگ : باج مُزّ «انعام» گرگ - جَن گرگ : مردین ءِ گوں جنینے ءَ سور کنگ - چمّ ءِ گرگ : چمّ ءِ نادراهی - دْراج گرگ : پاداں دْراج کنگ ءُ تچ بیگ - دست گرگ : رسگ ، دست ء‍َ زیرگ - دل ءِ گرگ : کسے ءِ دل ءَ وتی نیمگ ءَ ترّینَگ یا دل ءِ نادراهی ءِ گرگ - دنز گرگ : سک تْرند ءُ تیز روگ انچوش روگ کہ دنز پاد بئیت - ڈَکّ ءِ گرگ : راه ءِ گرگ - ره گرگ : روانگ بوگ ، روگ - راه ءَ گرگ : راه ءَ بندگ یا راه ءَ بیگ - رشت گرگ : تیز روگ - رند ءِ گرگ : کسے ءِ رندگیری کنگ - رُو ءِ گرگ : دیم ءَ تهار کنگ ، دیم ءَ ترّینگ - زهر گرگ _ مُلک ءِ گرگ ، کلات ءِ گرگ ، دُزّ ءِ گرگ ، هراب کار ءِ گرگ : سْیہ کار ءِ گرگ ، دام ءِ گرگ .

گَرّگ : (گَ رْ رَ گْ) گارگ : پس ءِ شِدگ بلے کم کارمرد بیت کہ وش زیمر ءُ ندکاری نہ اِنت چوناهیگا باز کْوهنیں لچهکاراں "بور ءِ گَرّگ" کارمرز کتگ بلے جْوان نہ اِنت . PPB , LWD ; GARAGH : To neigh.

گُرّگ : (گُ رْ رَ گْ) پہ جنگ ءَ ءُ زهر ءَ وتی نہ وشّی ءَ زاهر کنگ ءِ توار - پِشّی ، کُچک یا رستر کہ پہ مڑگ ءَ گُرّ اِیت ءُ گْرانیں توارے در کنت - لاپ ءِ گُرّگ : روتانی گُرّگ چہ شُد ءَ . «لاپ کہ گُرّ اِیت دنتان سِنگ بُرّ ایت»