آس

آس: ( آ ـ س) بْرانزوک ءُ لمبوک ءُ سوچوک ءُ سکّیں گرمیں روکیں چیزے کہ ھرچ چیز چہ ایشی ءَ گرم کنگ بیت ءُ وَرَگ گوں ھمیشی گْرادگ بیت. سکّ گرم، آچ، آچش.

آس: ( آ ـ س) ھرچ چیزے کہ سُھر بہ بیت، ھرچ چیزے کہ سوچوک بہ بیت پہ دروری آیاں گْوش اَنت (۲) تلاہ ءُ تنگہ ءُ سُھر ءَ ھم پہ دروری گْوش اَنت (۳) کلپیں مردم، پِتنہ کنوکیں مردم، تْرند تَبیں مردم ـ آس ءَ ایر کپگ: بزاں چَر ءَ ایر کپگ، پہ سوگندی یا کہ وشمنّی ـ آس ءُ آسکاری کنگ: تُپنگ کاری کنگ، ٹیکّ ءُ ٹھک کنگ ـ آس ءُ آپ ءَ یکّ کنگ: نارَندیں کنگ، نہ بوتگیں کارے ءِ کنگ، نہ ٹھوکیں دو چیزاں یک جاہ کنگ، آس آرگ: چمّانی پہ زھر، پہ مِھر، پہ باھند، پہ بے تاھیری. آس بند: ھما کہ آس ئِے نہ سوچ اِیت، آس بند کنگ، آس بُن آس: مزنیں آسے روک کنگ، پہ کارے کنگ ءَ مِرّ کنگ ءُ نندگ کہ لازم بہ بیت آس برگ: تپنگ ءِ یا دگہ انچیں آس برے ءِ یا مردم ءِ آس برگ بزاں زھر گرگ. آس ءِ بَلگ: روک بیگ، آس ءِ بُن دیگ یا بُن گِرگ: بزاں روک کنگ یا روک بیگ. آس پیش کنگ: سکّ جنجال کنگ، شور کنگ، آس ءِ پشک ءَ کپگ: بزاں پشک ءِ آس گرگ، سوکیگ بیگ، بے تاھیری، باھند کنگ آس ءِ پاد آیگ: گیش بیگ، جنگ ءُ اڑ ءِ مستر بیگ، آس ءِ پاد کنگ: آس ءَ گیش کنگ، آس ءَ جُمبلاس کنگ، جنگ ءِ گیشتر کنگ، اَڑ ءَ مستر کنگ، سلاہ کرتگیں داوا ءُ اَڑ ءَ پد ءَ چِست کنگ، کسے ءَ پہ زھر گرائینگ ءَ یا پہ جنگ ءُ مِڑ ءَ سِکین ءُ گُتّ ءُ سُجّ کنگ کہ ھون ئِے گرم بہ گپت ءُ پہ جنگ ءَ پاد بئیت، آس ءِ پِلِکّگ: بزاں آس ءِ ورگ، مزنیں تُرسناکیں کار کنگ ، چہ کارے ءِ کنگ ءَ بیزاری سھرا کنگ گنوکیں کار کنگ. آس ءَ آپ جنگ: آس ءِ توسگ، اَڑ ءُ داوا ءَ سلاہ کنگ ءِ ھاتر ءَ جْوانیں گپّ جنگ، آس ءَ جَنَگ: برباد کنگ، بیران کنگ، آس ءِ جگّگ: گنوکی کنگ. آس دیگ: سوچگ، بُن دیگ. آس دیگ: تپنگ جنگ یا دگہ انچیں آسکارے ءِ، آس دیگ: چمَانی پہ زھر، پہ مِھر، پہ بے تاھیری باھند، آس ماں دل ءَ دیگ: سکّ واری دیگ، سوکیگ کنگ، آس دارگ: بزاں روک کنگ گیشتر پہ کسے ءِ سوج ءُ رھشونی ءَ، آس ءِ دپ جنگ: بْرانزانی گرمی ءِ پہ مرد ءَ رسگ، سکّیں لمبوکیں آس ءِ کسّ ءَ نزّیک ءِ نیلگ. آس ءِ روک کنگ: بُن دیگ، جنگ ءِ پاد کنگ. آس روک کنگ: ورگ گْرادگ، کنوَر کنگ. آس ءِ سر ءَ روگ: چر ءَ ایر کپگ پہ سوگندی یا کہ وشمنّی ءُ چمّ بندی، آس ءِ ریچگ: بدیں کار کنگ، مردماں واری دیگ، نارَندیں کنگ. آس ءِ رچگ: اَزاب ءِ آیگ، آپت ءُ واری آیگ. آس ءِ زبانک دیگ: سکّ لمبوک بیگ، بْرانز شانگ. آس کنگ: آس ءُ پیشّ کنگ، کارے ءِ پہ اشتاپی کنگ ءَ مردماں کڈّن کنگ، ناروائیں زوراکی کنگ، آس ءِ روک کنگ. آس کاری کنگ: آس ءُ آسکاری کنگ بزاں تُپنگ کاری کنگ، آس کَشّگ: یلہ کنگ، ویل کنگ، نہ لوٹگ، بیزار بیگ، سوچگ، آس کپگ: سُچگ، بُن گرگ، بیراں بیگ، برباد بیگ ، جنگے ءُ داوایے ءِ بیگ، آس ءِ کپگ: جاگھے ءَ آسے بُن بیگ ءُ جاگھاں سوچگ، بتل: آس کہ کپ اِیت تَرّ ءُ ھُشک نہ زانت. آس گِرَگ: چیزے ءَ آس ءِ گرگ بزاں سُچگ، بْرانز گِرگ، زھر گِرگ، تپنگ ءِ آس گرگ. آس گْوارگ: سکّ گرم بیگ، سکّیں مُسیبت ءُ ازاب ءِ کپگ ، تُپنگانی آس گْوارگ. آس وَرَگ: سوگند ورگ، پہ چمّ بندی یا وشمنّی ـ آس ءَ کُشگ: آپ پرّیچگ ، جنگ ءَ سارت کنگ. آس ءَ جَنَگ: چیزے ءِ آس جَنَگ بزاں آس دیگ، آس ءَ جَنَگ: چیزے ءَ برباد ءُ بیران کنگ، آس ءَ کنگ: سوچگ پہ پچگ ءِ ھاتر ءَ، آس ءَ ایر کپگ: پہ سوگند واری چَر ءَ ایر کپگ یا پہ وش منّی ءَ، جنگ ءَ مان دیگ ، آس ءَ کپگ: آس ءِ تہ ءَ کپگ، سُچگ، بیراں بیگ، اَڑ ءُ جیڑہ ءِ تہ ءَ کپگ. آس ءِ مان دارگ : روک کنگ ـ دگہ چیز ءَ مان دارگ بزاں سوچگ، پہ سوجی آس روک کنگ، پہ ڈاہ دیگ، آس ءِ تیز بیگ: بزاں تْرند ءُ گیشتر بیگ، آس ءِ کُشگ: پہ آپ آس ءِ توسگ، تُنّ ءِ پْروشگ، آس ءِ روک کنگ: آس ءِ بُن دیگ، جنگ ءِ پاد کنگ ، جیڑہ ءِ چِست کنگ، آس ءِ بُن دیگ: روک کنگ، آس ءِ مِرَگ: تُسگ کسے کہ آس ءَ کُش اِیت آس مِر اِیت، وتی سر ءَ وت ھم مِر اِیت. آس ءُ: آس ءُ آپ یکّ کنگ، بزاں سکّ جُھد کنگ، نہ بیتگیں کار کنگ، نہ ٹھہ اِتگیں کارے کنگ، نارَندیں کنگ، آس ءُ آپ گْوازینگ: چہ ھر تاوان ءُ بیرانی ءَ پھریزگ ءُ رکّینگ (۲) آس ءُ آسکاری کنگ: جنگ پہ تپنگ یا دگہ آسکاری کنگ، آس ءُ جمبلاس کنگ (۳) آس ءُ دیت کنگ: آس ءَ روک کنگ بلے چو ترّیں دارانیگ ءَ دیتّ باز کنگ، پہ کارے ءَ بے اجامی ءُ بے رھبندی کنگ. (۴) آس ءُ بُناس کنگ: دُو دُو کنگ، آس ءَ روک کنگ ءُ پہ کارے یا پاس جَنَگ، نندگ (۵) آس ءُ انگر، آس ءَ پتْروشگ، آس ءُ پیشّ.