دل

دل: (دِ لْ )ساھدار ءِ بدن ءِ لازمی بھرے کہ تمامیں بدن ءَ ھون پُجّین ایت ، مردم ءِ دل کہ سینگ ءَ چپی پھلوگانی چیری نیمگ ءَ اِنت ایشی ءِ جنگ زندمانی ءِ نشانی اِنت، دل ءِ گال گوں دگہ گالانی ھمگرنچی ءَ (جُتگالی ءَ ) باز کارمرد بیت ا ک: بد دل، بْرتکگ دل ،بز دل ،بے دل، پرشتگ دل، ڈَڈّیں دل، رتکگ دل(ریتّہ دل )،سستگ دل،ستکگ دل،سکّیں دل، سنگ دل ،سیاہ دل،شیردل، کسان دل، کھ دل ، مرتگ دل ، مزار دل ، نزور دل، وش دل ، یک دل ءُ دگہ دگہ ... گالبند: دل آپ بوگ: سک تُرسگ ، دل ءَ آرگ: ماں دل ءَ مارگ گپّے ءِ شگانے ءِ ، دل ءِ ایر مِرگ: دل ءِ ایر نندگ بزاں تُسمارگو بوگ ، دل ءِ تُسگ: تنسار بوگ ، دل ءِ بد بوگ: بزاں دل ءِ ھراب بوگ، پہ شانگ ءَ ھدوک بوگ ، دلبڈّی دیگ : تسلّی دیگ ، ھمّت دیگ ، دل ءَ بندگ: سکّ دوست دارگ ءُ پھریزگ ، دل ءِ بند بیگ: پہ یک چیزّے ءَ کہ ترا پسند بہ بیت، پہ مردمے ءِ گندگ ءَ ، دل ءِ بود آرگ: ھوش ءَ آیگ ، دل بَیَگ: شات بیگ ، دل ءِ پر دیگ: کارے ءِ سر ءَ یا وانگ ءَ بزاں دلگوش دیگ ، دل ءِ پر کنگ: ھمّت کنگ ، بروسہ کنگ ، دل ءِ پروشگ: بے امیت کنگ ، دل ءِ پْرشگ یا دلپروش بوگ: بے امیت بوگ چہ مردمے یا چہ چیزّے ءَ ، دل ءَ پِرّینگ: دل ءَ دور دیگ ، دل تْرکّ بوگ: سک تُرسگ ،دل پَٹ بوگ ، دل ءِ تْرکّگ: سک باز تَورگ کہ چہ سگگ ءِ ھد ءَ در بہ بیت دل ءِ تُسگ: بچار دل ءِ ایر مِرگ ، دل ءِ جنگ: دز ءِ دل جنت بزاں زانگ کہ آئی ءَ دزّی کتگ ،دل ءِ دْریک دْریک کنگ ، دل چارگ یا دل ءَ چارگ: دو دلگ بوگ ، دل دارگ یا دل ءَ دارگ: اوپار کشگ،سگگ،برداشت کنگ ، دل ءَ دارگ: ١-سگگ ، اوپار کشگ ٢ -سک دوست دارگ ٣-گپّے ءِ دل ءَ دارگ بزاں دل ءَ آرگ ، دل ءِ دْریکّگ: دل ءِ تیز جنگ ،دل ءِ دْریکّ دْریکّ کنگ ، دل ءِ ڈَڈّ کنگ: دل ءِ مُھر کنگ ، دل ءِ مزن کنگ، ھمّت کنگ ، دل ڈَڈّی دیگ: بچار دل بڈّی دیگ،، دل ءِ روپگ: تْرُپشیں چیزّے ءِ ورگ کہ دل سبک بہ بیت دل ریش بوگ: شزار بوگ ، دلسیاہ بوگ ، بے زار بوگ دل ریش کنگ: کسے ءَ دلسیاہ ءُ شزار کنگ دل سند بوگ: جگرو بوگ ، تُرسگ دل ءِ سھڑینگ: وت ءَ تسلّہ دیگ دل سیاہ کنگ: کسے ءَ بے زار کنگ دل سیاہ بوگ: چہ کسے ءَ یا کارے ءَ بے زار بوگ دل ءَ کپگ: ورگ ءِ پسند بیگ دل ءِ کپگ: دل ءِ دور دیگ ، ھمّت ءِ یلہ دیگ دل کنگ: ھمت کنگ دل گوش بوگ: ھیال ءَ یک گْورے کنگ پہ گپّے ءِ گوشدارگ ءَ ،چیزّے ءِ چارگ ءَ ،سیل ءُ ندارگ ءَ دل گوش دارگ یا دل گوش کنگ: ھیال گْور کنگ ،چارگ,, توجہ دینا ،، دل ءِ مُشگ: ماں زمین ءَ ،بش بش ورگ ، اپسوز ورگ دل موش کنگ: سر سر جنگ دل ءِ واپینگ: کسے پہ تسلّہ ریپینگ ، انچیں رنگے ءَ کسے ءَ تاوان دیگ کہ پیسر ءَ آئی ءَ سما مہ بیت.