بیر

بیر: (بِ ےْ ر ) بدیں بدل ، بدی ءِ بدل ، کسے گوں یکے ءَ نارندیں کارے بہ کنت یا نا روائیں گپّے بہ جنت آئی ءِ ھما رنگیں پسّو ءَ ,,بیر,, گوش اَنت اک: لٹ بیر ، زاہ بیر ، ھون بیر ، پلانی ترا بیرے پر اِنت - بیر بندگ: کسے ءِ لَٹ بیر یا ھون بیر ءِ دیم ءَ زرّ بندگ ءُ دیگ - بیر ترّینگ: زاہ ءُ بد ءِ پسو ءَ زاہ ءُ بد دیگ - بیر دیگ: لٹ یا ھون بیر پُرّ کنگ ءُ دیگ - بیر گرگ: بدل گرگ لٹ بیر یا ھون بیر ءِ بدل پہ لٹ ءُ ھون گرگ - بیر ءِ رَوگ: گریب یا بے جوازت ءُ نزوریں مردم ءِ بیر ءَ کہ کس نہ گر ایت بزاں بیر ئِے روت

بیر: (بِ یْ ر ) گِروک ، داں کہ جمبران اِنت آئی ءَ گروک گْوش اَنت بلے وھدے کہ زمین ءَ کپ ایت,, نپت,, ئِے گوش اَنت ،بلوچ ھمے نپت ءَ کہ زمین ءَ ایر روت,, بیر,, گوش اَنت ، گوش اَنت اے وھد ءَ کہ بیر زمین ءَ کپ ایت زمین ءَ دِرّان کنت ءُ جھل ءَ روت دانکہ آپ ءَ بہ رس ایت وھدیکہ آپ ءَ بہ رس ایت سارت بیت ءُ آسن بیت ھمے آسن بے جوڑہ ءُ بے دروریں آسنے کہ اشی ءِ دست کپگ گران ءُ مشکلیں کارے ، ھر کس ءَ کہ دست بہ کپ ایت چہ اشی ءَ زھم جوڑ کن اَنت پمیشکا زھم ءَ ھم بیر گوش اَنت کہ چہ بیر ءَ جوڑ بیتگ ءُ ایشی ءِ رہ ءَ ھچ چیز داشت نہ کنت ھچ اسپر ایشی ءَ داشت نہ کنت کہ پہ آسانی بارت ئِے ، گوش اَنت کہ ایسُپ ھان ء مولداد ھان ءَ کہ ھاجی نواب ھان راسکی ءِ پت بوتگ انچیں زھمے بوتگ - یک آسنے ھست کہ بیر ئِے گوش اَنت کہ پْرشوکے بلے نہ لپّ ایت ٢-سکّیں سارتی ءُ گوڑ ءَ گْوش اَنت ٣- کتر ءِ مزنیں ٹُکرے ءَ ھم گوش اَنت کہ کہ باز بر ءَ چہ سکّیں سارتی ءَ کپ ایت,, بلوچ ایشی ءَ جمبری ٹُکرے گوش اَنت ،،

بیرّ: (بِ یْ رّ )بچار,, بور ،،